DAVAO CITY – Giila na sa Tagum PNP ang babaye nga naplagang wa nay kinabuhi ug gisulod og sako sa Apokon-Timog Road, Tagum, Davao del Norte kagahapon sa udto, Pebrero 15.
Pagbutyag sa kapulisan, usa kini ka Jenelyn Zamora, 53-anyos, nagpuyo sa Purok 3G RTU Apokon, Tagum City kinsa gikatahong missing sukad Pebrero 10.
Sumala pa nga nakit-an ni Joseph Rey Pacong ang maong patayng lawas samtang nihunong kini arong mangihi atol sa paglatas niini sa may Timog, Visayan Village, Tagum City.
Nakuratan ang maong saksi dihang nakita nga migimaw ang tiil sa tawo sulod sa sako nga nahumol sa tubig.
Giila sab sa ka live-in ang maong patayng lawas diin saysay pa nga miingon ang biktima kaniya nga mouli kini sa ilang lugar sa Compostela niadtong Sabado sa gabii ug nahikurat siya sa dihang nahibaloan niya ang nahitabo sa iyang kapuyo.
Dali sab nga gilubong ang patayng lawas sa biktima sa Brgy. Busaon Public Cemetery.
Samtang nagpadayon ang imbestigasyon kung si kinsa ang responsable sa maong krimen.
