DAVAO CITY – Nagpadayon gihapon sa pag-imbestiga ang kapulisan ingon man ang pag-locate sa inahan sa batang masuso nga gikatahong gibilin sa usa ka farm sa Purok 7, Lacson, Calinan, ning dakbayan niadtong Enero 22 sa kabuntagon.
Sa pakighinabi sa Bombo Radyo Davao kag PCapt. Hazel Tuazon, tigpamaba sa Davao City Police Office, gikanayon sa opisyal nga subay sa imbestigasyon sa Women and Children Protection Desk sa Calinan Police, dunay nakakita sa inahan una pa kini nagbilin og bata sa may Apigo Farm.
Gibanabanang anaa sa 25 anyos ang pangidaron sa maong inahan.
Gilibot na sab sa kapulisan ang mga kasikbit nga barangay ug mga lying in clinics duol sa lugar aron kuhaon ang identity sa inahan.
Posible sab nga makasuhan ang inahan og kasong kalapasan sa RA 7610 kon Special Protection of Children Against Abuse, Exploitation and Discrimination Act alang sa bug-at nga silot sa panahon nga mailhan ang inahan.
Usa sa mga posibleng anggulo nga gitutukan pa gihapon nga dili residente sa nasangpit nga lugar ang maong suspek.
Nag-awhag ang DCPO alang sa mga dunay kasayuran nga idangop ang mga impormasyon sa pinakaduol nga police stations.
Kahinumduman nga na-rescue ang himsog nga batang masuso sa maong dapit human kini naplagan sa usa ka mag-uuma.
Gikustodiya na ang maong baby sa mga sakop sa Barangay Social Welfare Office.
