DAVAO CITY – Nagpadayag og hugot nga pahimangno si Senator Ronald Dela Rosa mahitungod kana sa naghitak nga kampanya dinhi sa Davao City sa People’s Initiative aron bag-uhon ang konstitusyon sa nasud.
Sumala pa sa senador, atol sa nahitabong funeral mass ni Archbishop Emeritus Fernando Capalla sa San Pedro Cathedral niadtong Enero 15, adunay mga barangay ang natunolan og kwarta gikan P100 ngadto P3,000 atol sa pagpangalap og pirma alang sa gikaingong People’s Initiative nga gipasiudgahan sa pipila ka mga grupo.
Hangyo pa sa senador nga dili kini pirmahan tungod dili katugbang sa nasangpit nga kantidad ang kaugmaon sa Pilipinas.
Kahinumduman nga nanggawas ang mga ebidensya mahitungod sa nahisgutang inisyatiba nga nagtumong sa pagpang-awhag sa katawhan nga mupirma aron amyendahan ang mga batakang balaod sa nasud bugti sa kwarta nga ilang madawat.
Una na mismong namahayag niini si Davao City 1st District Congressman Paolo Duterte nga sukwahi kini sa tinuod nga inisyatiba sa katawhan nga gipangunahan lamang sa mga dunay katugdanan sa gobyerno.
Nagkatag na sab ang mga poster sa kadalanan sa dakbayan nga nag-unod og mga pulong nga “Davaoenos Are Not For Sale.”
