DAVAO CITY – Nagpaklaro ang Land Transportation Franchising and Regulatory Board 11 nga walay labot ang tanang mga drayber sulod sa Davao City sa ipatuman nga Consolidation alang sa PUV Modernization Program hangtod Disyembre 31 ning tuiga.
Sa pakighinabi sa Bombo Radyo Davao, gikanayon ni Nonito Llanos III, ang regional director sa LTFRB Davao nga magpadayon gihapon ang pagpadagan sa ilang mga jeepney hangtod maimplementar ang Davao Public Transport Modernization Program o mas nailhan nga High Priority Bus System, subay kana sa gipagawas nga Board Resolution No. 120, Series of 2023.
Gihingusgan gihapon sa buhatan nga magpadayon gihapon ang implementasyon sa December 31 nga deadline sa Consolidation alang sa mga drayber gawas sa Davao City, ug mahinayon na ang pag-revoke sa ilang prangkisa karong Enero 1 sa sunod tuig kon dili makiglambigit niini ang mga drayber ug operator.
Hinuon, pagbuyag sa opisyal nga 80% na sa mga drayber gawas sa Davao City ang nakamugna na og kooperatiba alang sa consolidation.
Dugang pa sa buhatan, labing gikinahanglan nga mga rekisitos ang articles of cooperation gikan sa Cooperative Development Authority, affiavit of conformity nga nagpamatuod sa ilang pakig-alayon sa kooperatiba ug ang ilahang OR/CR.
Magadawat gihapon ang opisina sa LTFRB 11 alang sa filing karong Disyembre 31.
Samtang, gipasabot sa Land Transportation Franchising and Regulatory Board 11 ang tumong sa consolidation ilawom sa PUV Modernization Program sa gobyerno.
Sumala pa sa opisyal , ang pagmugna og kooperatiba sa mga jeepney drivers ug operators ang makapahawan sa ginatawag nga boundary system ug mamahimong muhulip nini ang mga dibidendo nga malikom sa matag myembro sa mga kooperatiba.
Nagpaklaro sab ang ahensya nga dunay ginatawag nga equity subsidy program nga usa ka grant ug dili loan nga ihatag sa DOTR ug LTFRB alang kadtong mukuha og modernized units diin maghatag kini og P280,000 nga grant alang sa pagkuha og bag-ong unit sa sakyanan.
Gipasalig sab sa ahensya nga makig-alayon ang mga suppliers alang sa sakto nga presyuhan sa mga unit nga mamahimong pahimuslan sa mga drayber ug operator.
Gipanghimakak sab sa opisyal nga muusbaw ang pletehan sa mga modernized jeepneys.
Sanglit gipasalig sab sa ahensya nga magpabiling barato ug kumportable ang pagsakay sa mga commuter sama na lamang sa mga mananakayay sa Digos City, Davao del Sur nga unang nakapaimplementar ug 60 ka modernized vehicles sa rehiyon.
Sa laing bahin, nagpadayon gihapon ang LTFRB 11 sa pagbantay sa mga masinupakong taxi drivers pinaagi sa Oplan Isnabero nga makigbatok sa mga wala nagapasakay nga mga taxi drivers sa dakbayan.
via || Bombo LJF
