DAVAO CITY – Nadisgrasya ang duha ka babaye diin usa ang nakabsan sa kinabuhi ug usa ang naangol human naligsan og dagkong truck sa may Purok 11, Bud-bud, Barangay Bunawan, Davao City, pasado alas 10:13 sa buntag, adlawng Miyerkules, Oktobre 25, 2023.
Sumala sa taho sa Bunawan PNP, giila ang mga nabangga nga sila Anafe Salgado, 42 anyos, tag-Prk. 4, Cal Village, Tibungco, Davao City; ug Geralen Nuñez, 36 anyos, taga-Prk.7-B Inabangga, Bunawan, Davao City.
Subay sa report, samtang nagsubay ang prime mover truck sa may Maharlika Highway sa maong dapit nga gimaheho sa usa ka Jemvar Cantilla Melendres, 40 anyos nga taga-Purok 6 Pisian, Ilang, Davao City, wala niini mabantayan ang pagtabok sa duha ka babaye sa dalan.
Hinungdan nga nalatayan sa ligid sa trak ang biktimang si Anafe, samtang nakahiagum og serious physical injury ang laing biktima nga si Geralen ug gitabang ngadto sa Southern Philippines Medical Center.
Gikistodiya na ang drayber sa trak ngadto sa Bunawan Police Station nga gikatakda nga pasakaaan og kasong Reckless Imprudence Resulting in Homicide and Serious Physical Injury.
via || Bombo LJF
