DAVAO CITY – Gipagawas na ang warrant of arrest batok sa upat ka sundalo nga sakop sa 10th Infantry Division nga nalambigit sa kamatayon sa modelo ug negosyanteng si Yvonette Chua Plaza.
Subay sa gipagula nga warrant ni Davao City RTC Branch 15 Judge Mario Duaves, gikatakdang pandakpon sila Colonel Michael Licyayo, Sergeant Gilbert Plaza, Sergeant Delfin Sialsa Jr., ug Corporal Adrian Cachero.
Gipagawas ang nasangpit nga warrant niadtong Setyembre 22, 2023.
Nasayran nga wala nahilakip sa napasakaan og warrant ang giingong mastermind sa insidente nga si kanhi 1001st Brigade ug Presidential Security Group Brigadier General Jesus Durante sa dihang gisang-at na ang kaso sa korte gumikan wala matod pay igong ebidensya nga makatudlo nga siya mismo ang nagsugo sa pagpatay sa modelo.
Walay girekomendang pyansa ang korte sa kasong murder nga giatubang sa mga akusado.
Una nang gipahibalo sa 10ID nga dili nila i-condone ang mga bihuhatan sa bisan unsang law enforcing personnel nga matud pa sukwahi sa prinsipyo sa pagpatuman og balaod.
Kahinumdumang gipusil-patay si Chua kaniadtong Disyembre 29, 2022 sa ilang panimalay sa Barangay Sto. Niño, Tugbok, Davao City.
Una nang nasayran sa SITG Plaza ang relasyon tali kanhi Brig. Gen. Durante ug Plaza diin selos ang gitudlong motibo sa maong pagpamanhig.
Nasayran sab nga gikuptan ni Plaza ang mga sensitibong impormasyon nga iyang gamiton sa blackmailing batok kang Durante.
Gawas sa kasong murder, gipahamtang sab ang kasong paglapas sa Presidential Decree 1829 o Obstruction of Justice human gisunog ang mga personal nga gamit sa biktima nga anaa ang mga ebedensiya.
Anaa na sa kustodiya sa 10ID headquarters sa Barangay Tuburan, Mawab, Davao de Oro ang upat ka mga nahisgutang akusado.
Enero 25 ning tuiga dihang gideklarang Cased Closed na ang nahisgutang kaso.
