DAVAO CITY – Gikabuytag sa Tagum PNP nga gipailawom na sa inquest proceedings sugod kagahapon ang katabang ni Tagum City Councilor Leo Revita nga si Sharmaine Jane Ramos o mas iladong si Ligaya nga desididong pagakasuhan sa konsehal gumikan sa kasong pagpangawat.
Sa pakighinabi sa Bombo Radyo Davao kang PLt./Col. Jeffrey Latayada, hepe sa Tagum PNP, iyang gibutyag nga gihikay na ang kasong Qualifying Theft batok kang Ligaya.
Nagpadayag sab sa ilabihang pagbasol ang kanhi kaubanan sa Team Hamloy sa nabuhat niini nga pagpangawat pinaagi sa usa ka digital wallet app nga miabot sa dul-ang P200,000 ang kantidad nga nalimas gikan sa account ni Revita.
Nangayo sab kini og pasaylo ngadto kang Konsehal Revita ug nagsaad kini alang sa hingpit nga pagbag-o. Hangyo pa niini sa mga tigsubaybay sa Team Hamloy ang dugang pagsabot sa iyang kahimtang ilabi na sa iyang anak.
Kahinumduman nga gibulgar ning nakalabayng gabii sa konsehal ang binuhatan ni Ligaya ug gilayong napakulong nila ang nahisgutan.
Nagpahibalo karon ang Tagum PNP ngadto sa mga nangita og katabang sa panimalay, siguraduhon nga i-double check ang pagkatawo sa pagakuhaon nga sakop ayha pa man ipasalig ang mga kabtangan, obligasyon ug responsibilidad niini.
via || Bombo LJF
