DAVAO CITY – Laing lalaki ang nakabsan sa kinabuhi human nalumos sa kadagatan ning dakbayan. Gikabutyag sa San Pedro Police ang maong lalaki nga si Charles John Loregas, 21 anyos, taga- Purok 21, Manggahan, Bucana, Brgy 76-A, Davao City.
Napalgan ang patayng lawas sa nahisgutan sa usa ka bangka sa Purok 5, Bucana Seawall, Brgy. 76-A, ning dakbayan.
Matud pa sa ginikanan ni Loregas, nag-antos kini sa ilabihang kaguol gumikan sa gihambing nga balatian. Ulahing nakit-an ang ulitawo nga naglakaw ug nag-inusara sa seawall bandang alas 2 sa buntag sa susamang adlaw.
Giklaro sa kapulisan nga walay foul play sa kamatayon sa biktima, apan gikunmbinser gihapon sa otoridad ang pamilya nga ipasailawom ang patayng lawas sa otopsiya. Gilagak na sa usa ka punerarya ang patayng lawas sa maong ulitawo.
Dugang pagpaklaro sab sa kapulisan nga wala kini kalabutan sa naunang drowning incident nga nahitabo sa usa ka resort sa Bago Aplaya, Davao City, diin duha ka lalaki ang nakabsan sa kinabuhi.
Unang narekober ang patayng lawas niadtong Setyembre 3 ang 13 anyos nga si Harvey Prince Momo, ug kagahapon sa buntag lamang nakit-an ang patayng lawas sa 20 anyos nga si Jhon Alfred Amalias tapad sa Mergrande Beach Resort diin ulahing giadtoan sa duha ka lalaki.
Hinuon, nagpadayon ang paghatag og hinabang sa mga tigdumala sa maong resort sa mga nagbangutang pamilya.
Nagpahinumdom karon ang Davao City Disaster Risk Reduction Management Office ngadto sa mga tigligoan og dagat nga mag-amping ilabi na sa panahon sa pag-igo sa Hanging Habagat.
Sumala ni CDRRMO Chief Alfredo Baluran, ilang gipahimangnoan karon ang mga disaster teams lakip na mga residente sa 26 ka mga coastal barangay sa dakbayan nga mamahimong alerto gumikan sa dili maayong panahon.
via || Bombo LJF
