DAVAO CITY – Gipanawagan sa mga pedicab drivers sa Tagum City, Davao del Norte ang dugang 5 pesos nga usbaw sa mimimum nga plitehan gumikan sa kamahal sa presyo sa mga palaliton ingon man ang pagpatubil.
Apan taliwala sa maong gikasugyot, sumala pa sa Traffic Management Unit sa syudad, dili pa kini mamahimong epektibo tungod wala pa nakaabot sa ilang opisina ang maong taho.
Sumala pa ni TMU Head Francisco Sevilles Jr., aprobado na sa Sanggunian ang maong katuyoan ug migawas na ang fare matrix apan wala pa kini final nga mando aron kini mapaimplementar.
Kasamtangang gisunod sa mga drayber ang daan nga taripa samtang dunay mahitabo nga pag-adjust sa pletihan kini nakabase sa kausaban sa presyo sa gasolina. Laraw sab karon sa CTFRB nga magpagawas og taripa nga ipapilit sa mga traysikel.
Nagpadayon sab ang TMU sa pagpangdakop sa mga Bao-Bao nga namasahero sa kadalanan, sanglit wala pa naaprobahan ang giduso sa CTFRB nga Point to Point trips sa managlahing bahin sa syudad.
