DAVAO CITY – Gisusi sa mga sakop sa Davao City Engineer’s Office ug Office of the City Building Official ang gambalay sa Buhangin-Cabantian Road, Davao City kon asa nakabsan sa kinabuhi ang magsuon nga sila Noli Antao ug Garry Antao niadtong Miyerkules sa hapon.
Giadto sa mga sakop sa duha ka opisina ang Building C sa Amani Grand City Gate Condominium nga usa ka ongoing project ilawom sa pagdumala sa Grand City, Inc. Nasayran sa maong pagbisita nga nagpadayon gihapon ang construction sa maong gambalay.
Kumpleto sa tanang safety gear ang mga trabahante, lakip na ang safety net sa matag kilid sa building. Gikumpirma sa Office of the City Building Official nga adunay building permit ang maong gambalay, apan ipasusi nila kini pag-usab human sa nahitabong insidente diin posibleng ipakanaog ang work stoppage order ang contractor sa maong building alang sa halawom nga imbestigasyon.
Pipila sa mga gikasusi sa OGBO sa maong panghitabo ang kalapasan sa contractor ingon man sa safety officer sa building.
Ginahulat na lamang ang mamahimong resulta sa imbestigasyon gikan sa OGBO alang sa pag-isyu sa work stoppage order ilawom sab sa kamanduan sa DOLE 11.
Posible sab nga muatubang og silot nga may kalabutan sa paglapas sa occupational safety and health standards of a workplace ang construction company nga nagdumala sa construction sa Building C sa Amani Grand City Gate Condominium.
