DAVAO CITY – Napuhag ang gipahigayong ilegal nga sabong sa Sitio Gatong, Brgy. Palma Gil, Talaingod, Davao del Norte human nga gisudlan kini sa mga otoridad.
Sumala sa report sa Talaingod Municipal Police, pag-abot nila sa maong lugar, nag-iyahay na og dagan paingon sa kabagnotan ang mga nasakpang mga sabungero.
Apan nakumpiska hinuon ang mga napalgang ebidensya sama sa usa ka buhing manok-pantari, usa ka patay nga manok-panari, duha ka gaff, ug nasa dul-ang P500 na gituohang bet money.
Napakyas ang mga otoridad nga madakpan ang mga sabungero apan giila nila kining sila alyas Dom ug alyas Robi, pulos taga-Sitio Dulyan, Brgy. Palma Gil, Talaingod; ug si alyas Gardo nga taga-Sitio Butay, Brgy. Palma Gil, Talaingod.
Giandam na ang kasong pagsupak sa Presidential Decree 1602 kon Philippine Gambling Laws, samtang gipangita na sila karon sa mga otoridad.
via || Bombo LJF
