DAVAO CITY – Nagpatabang sa NBI 11 ang laing freelance model nga nagkanayong gilugos sab sa myembro sa Philippine Coast Guard nga si Khalid Abdullah nga una nang gireklamo nga nanglugos sa usa ka modelo.
Sa pag-atubang sa biktima sa NBI 11 kagahapon, gibutyag sa nipatim-aw na 23 anyos nga biktima nga gitago isip alyas “Inna”, una siyang gitawagan sa nagpailang heneral nga si Abdullah kaniadtong Nobyembre 29, 2022 aron kuhaong model sa event sa usa ka casino sa Davao City.
Niingon sab nga gikuha ang contact number gikan sa kaila sa biktima ngadto sa suspek. Gisundo ang maong biktima bandang alas 7 sa gabii, sanglit alas 10 sa gabii pa daw magsugod ang event. Samtang sakay sa sakyanan sa suspek, gihunong kini sa usa ka ngitngit nga lugar sa Buhangin, ning dakbayan.
Ug dihang tungura, giingon ni Abdullah nga dili na madayon ang event.
Nibalibad ang biktima dihang gihanyagan siya sa suspek nga mamahimong asset sa usa ka buybust operation sa Indangan.
Nihunong usab silang duha sa ngitngit nga bahin sa Barangay Cabantian ug diha na siya gihulga ug gitutukan og pusil sa suspek nga si Abdullah.
Sumala pa sa biktima, wala na siya nakasinggit og tabang dihang gilugos na siya sa likod nga bahin sa sakyanan ni Abdullah.
Nakasinati ang biktima og ilabihang trauma sulod sa pipila ka bulan gumikan sa maong panghitabo.
Apan, nagbaton siya og kusog nga mupatim-aw sa mga otoridad gumikan sa pagtudlo sa iyang higalang modelo nga si alyas “Anna” ngadto kang Abdullah nga naglugos kaniya, atol sa pagkasikop sa suspek niadtong Abril 22.
Sumala sa NBI 11, parehong expired nga pusil ang gigamit ni Abdullah sa duha ka krimen atol sa pagpanghasi og pagpanglugos sa duha ka biktima.
Nag-awhag sab ang NBI ngadto sa mga posibleng biktima ni Abdullah nga mopatim-aw na kanila.
Gikatakdang ipasaka ni alyas “Inna” ang mga kasong Usurpation of Authority, Rape, Human Trafficking, ug Illegal Possesion of Firearms batok kang Abdullah nga kasamtangang gikustodiya na sa NBI 11.
via || Bombo LJF
