DAVAO CITY – Gikabutyag sa Tagum PNP nga duna silay gitutukan nga person of interest sa kamatayon sa 18 anyos nga working student nga si Nike Andy Riana Kassim.
Sumala ni Lt. Col. Edgardo Bernardo, hepe sa Tagum City Police, usa ka saksi ang nakabutyag nga adunay nagasundo kaniya nga driver sa motorsiklo nga gituohang uyab sa biktima.
Subay pa sa inisyal nga imbestigasyon, niadtong Abril 23 sa kaadlawon, atol sa iyang pagpanarbaho sa usa ka spa, gisundo si Nike sa maong tawo gikan sa convenience store.
Gidala sa maong gidudahang kaila ang biktima ngadto sa ngitngit nga bahin sa crime scene.
Lain pang saksi duol sa gikahimutangan sa bangkay sa babaye ang nakamatikod sa panagbangi sa duha ka partido una pa man nahitabo ang kalit nga gikatalang pagkahanaw ni Nike.
Nagpakitabang pa ang biktima sa iyang higala pinaagi sa chat apan wala kini gipanumbalingan tungod gituohang nag-gara gara lang kini.
Apan ulahi na dihang nasayran nga nakabsan sa kinabuhi ang biktima human sa pipila ka adlaw nga pagpangita.
Gi-turn over na sa PNP Cyber Crime group ang giprendang cellphone ni Nike aron sutaon ang nahimong pakig-istorya tali sa biktima ug sa gituohang uyab niini pinaagi sa chat.
Kahinumdumang kaniadtong Abril 25 sa hapon, napalgang patay ang biktima sa usa ka bakanteng lote duol sa tulunghaan sa Purok Pine Tree, Magugpo North, Tagum City, Davao del Norte.
Una nang gikabutyag ni Tagum City Mayor Rey Uy nga selos ang gitutukang anggulo sa nahitabong pagpatay kang Nike.
Kasamtangang naghimo na og mga lakang ang mga otoridad aron hingpit nang masikop ang responsable sa kamatayon sa biktima.
via || Bombo LJF
