DAVAO CITY – Gisugdan na sa Philippine Army karong simanaha ang mga pagdungog batok kang kanhi Presidential Security Group commander Brig. Gen. Jesus Durante III ug lain pang unom ka mga kaubanang sundalo nga nalambigit sa pagpatay kang model ug negosyanteng si Yvonette Chua Plaza.
Aprubado na ni Philippine Army chief Lt. Gen. Romeo Brawner Jr. ang mga ipasakang kasong administratibo batok kang Durante ug mga kaubanan niining sila kanhi deputy commander sa 1001st Infantry Brigade nga si Col. Michael Licyayo; Staff Sergeant Gilbert Plaza; Sgt. Delfin Sialsa Jr.; Corporal Adrian Cachero ug Corporal Rolly Cabal; ug Private First Class Romark Longakit.
Gibalhin na sila Durante ug Licyayo sa Eastern Mindanao Command headquarters sa Camp Panacan, Davao City, nga unang gikustodiya sa Philippine Army headquarters sa Fort Bonifacio, Taguig City.
Samtang gunit gihapon sa militar sila Plaza, Sialsa, Cachero, ug Cabal; ug kasamtangang nagtago-tago si Longakit.
Si 10th Infantry Division commander Maj. Gen. Jose Eriel Niembra ang nanguna sa general court-martial proceedings sa militar uban ang laing lima ka mga senior officers ug usa ka legal officer nga nangunay sa mga pagdungog sa kaso.
Gikaatubang karon nila Durante ug unom pang mga personalidad ang kalapasan sa Articles of War 96 kon “conduct unbecoming of an officer and a gentleman”; ug Articles of War 97 kon “conduct prejudicial to good order and military discipline.”
Samtang gipasaka na sab kaniadtong Enero ang mga kasong kriminal nga murder, theft, ug obstruction of justice sa crimimal court batok sa mga gitudlong responsable sa kamatayon ni Plaza.
Kahinumduman, gipusil si Chua-Plaza diha mismo sa iyang puloy-anan sa Buttercup Green Meadows, Brgy. Sto. Nino, Tugbok, Davao City kaniadong Disyembre 28, 2022, bandang alas-7:45 sa gabii.
Una nang nasayran sa SITG Plaza ang relasyon tali Durante ug Plaza diin selos ang gitudlong motibo sa maong pagpamanhig.
Nasayran sab nga gikuptan ni Plaza ang mga sensitibong impormasyon nga iyang gamiton sa blackmailing batok kang Durante.
Una nang gipanghimakak ni Durante ang mga alegasyon batok kaniya ug sa mga kaubanan.
via || Bombo LJF
