DAVAO CITY – Gipahugtan pa ang Bureau of Jail Management and Penology 11 ang ilang gitaganang protocols alang sa mga Persons Deprived of Liberty kon PDLs human gikabutyag sa ahensya nga nasudlan sila og mga kontrabando nga gikuha gikan sa tulo ka inmate sa Davao City Jail.
Sumala sa report nga kaniadtong Marso 31 ning tuiga, atol sa pagpahigayon og suppository procedure nga kabahin sa ilang protocol, nasigpatan sa ilang Duty Nurse ang mga droga nga gisulod sa sampot sa tulo ka mga preso nga giilang sila Jed Calumpang, Israel Clemente ug Neil Brian Pardi.
Nakuha gikan sa mga inmate ang duha ka pakete sa gituohang shabu, 10 ka tabletas sa gituohang ectasy, duha ka rolyo sa tresbe nga gibalot sa usa ka plastic bag.
Gibana-banaang nagkantidad og P130,000 ang mga nakumpiskang kontrabando.
Gilayon nila kining gireport sa Philippine Drug Enforcement Agency 11 ug kapulisan aron ipahibalo kini sa mga opisyal sa barangay lakip ang media.
Gikasuhan na ang tulo ka mga binilanggo og kalapasan sa Republic Act 9165 kon Comprehensive Dangerous Drugs Act of 2002.
Namatikdan sa buhatan ang pagmugna og mga pamaagi sa mga PDLs nga makasulod og kontrabando, busa ilang gipaniguro nga ila pang pahugtan ang ilang pagbantay ug pagpatuman sa mga protocols sa prisohan.
via || Bombo LJF
