DAVAO CITY – Nagpadayag og pagpasalamat ang mga nanguna sa nagmalampusong IronMan 70.3 triathlon kagahapong adlawa, Marso 26, diin libuan ka mga manan-away ang nahimong saksi sa maaksyon og intense nga papaspasay ug palahutay sa lapas 1,700 ka mga atleta gikan sa nagkalain-laing parte sa kalibutan.
Giila isip overall champion ilawom sa Professional Men’s Category si Filipe Avezedo gikan Portugal, sunod si Ognjen Stojanovic gikan Serbia isip second finisher, samtang si Tuan Chun Chang ang 3rd pro male athlete finisher gikan Taiwan.
Samtang gihatagan usab og pasidungog ang tulo ka mga triathletes ilawom sa Professional Women’s Category nga giilang sila Sarah Crowley gikan Australia isip first finisher; Lauren Brandon gikan USA isip ang 2nd finisher ug si Lottoe Lucas gikan sa nasud United Arab of Emirates isip 3rd pro-women athlete finisher.
Nakadaog sab sa prestihiyosong Tribo Maisugon award ang Tri SND Barracuda nga taga-Sultan Naga Dimaporo, Lanao Del Norte, nga nakadawat og P500,000 ug tropeyo nga gikulit ni Mindanaoan visual artist nga si Kublaii Millan.
Bisan pa man sa nahitabong sipyat sa scoring gumikan sa pagkatanggal sa swim course markers nga nagresulta sa pagtaktak sa swimming portion gikan sa final result alang sa age-group athletes ug relay teams sa karera, lakip na ang mga nahitabong disgrasya ug ubang sirkumsyansya sa ubang mga misalmot, gikanayon ni Davao City Sports Development Division chief na si Mikey Aportadera, nga gihuman sa mga atleta ang 70.3 kilometer nga ruta.
via || Bombo LJF
