DAVAO CITY -Naghangyo ang Department of Agriculture 11 ngadto sa mga mag-uuma sa repolyo sa Barangay Kapatagan, Digos City, Davao del Sur nga makig-alayon sa buhatan aron mapangitaan sila og buyer nga mupalit sa ilang mga produktong repolyo.
Gikumpirma ni Crystal Venus Santander, ang Regional Vegetable Focal sa DA 11 ang oversupply sa repolyo nga kasagarang ginatagud-tagud na lamang karon sa mga mag-uuma.
Nasayran nga anaa lamang sa P8.00 matag kilo ang farmgate price sa repolyo nga nagpasinati kanila og pagkalugi gumikan sab sa presyo sa abono ug transportasyon.
Tambag sa opisyal, maayong makig-alayon ang mga mag-uuma sa clustering ug consolidation sa buhatan uban ang ilang Provincial ug Municipal Agriculture Office sa ilang LGUs aron mahatagan og bag-ong kahibalo sa pagpananom aron malikayan ang oversupply sa ilang mga produkto.
Gipunting sab sa opisyal ang pagkamahinungdanon sa clustering aron mapangitaan og buyer ang ilang mga produkto ug makabawi sab sa kitaan ang mga mag-uuma.
Unang gikabutyag ni Regional Executive Director Abel James Monteagudo nga usa kini nga pampamatngon sa DA 11 aron mapakusgan ang ilang paghatod sa mga programa ngadto sa mga mag-uuma sa lagyong dapit.
Dugang pa nga adunay panginahanglanon nga bag-uhon ang market system og organisadong farm diversification sa mga mag-uuma alang sa halapad nga market access ug mabungahon nga anihan.
via || Bombo LJF
