DAVAO CITY – Balik face-to-face classes na sugod karong adlawa, Marso 20, ang tanang pampubliko ug pribadong tulunghaan sa Nabunturan, Davao de Oro human sa temporaryong suspensyon gumikan sa mga nasinatiang katalagman.
Base kini sa gipagawas nga Executive Order No. 18 Series of 2023 nga gipakanaog ni Nabunturan Mayor Myrocel Balili ug rekomendasyon sa MDRRMO human sa pipila ka adlaw nga assessment sa pipila ka bahin sa lugar.
Makapahigayon na ug klase ang ubang mga tulunghaan gawas na lamang sa mga wala mipasar sa natigayong Rapid Damage Assessment and Needs Analysis, lakip na duol sa mga unsafe areas sa lugar apan magpadayon gihapon ang modular o blended learning sa mga tumutuon.
Usa ang lungsod sa Nabunturan nga nakasinati og ilabihang kadaot gumikan sa nahitabong sagunsong pagtay-og sa probinsya sa Davao de Oro kaniadtong Marso 7.
via || Bombo LJF
