DAVAO CITY – Nakasinati pag-usab og laing katalagman ang pipila ka bahin sa Davao Region gumikan kana sa mga pag-ulan nga nagresulta sa pagbaha ug pagdahili sa yuta sa pipila ka probinsya.
Kagahapon, natala ang landslides sa mga barangay sa Bukal, Mainit, ug Katipunan, samtang nalunop sa tubig baha ang Barangay Maganding sa Nabunturan.
Giharangan sab sa nidahili nga yuta ang mga kadalanan sa Brgy. Mangagit, sa Maco; ug Brgy. Andap sa New Bataan.
Natala sab ang natigayong landslides sa Sitio Baay, Brgy. Luban, Mati City sa Davao Oriental. Pipila sab ka mga tulunghaan sa dakbayan sa Davao ang nagsuspinde sa ilang klase kagahapon gumikan sa daut nga panahon.
Sumala sab sa nahimong monitoring sa Davao City Disaster Risk Reduction and Management Office, nasa warning level ang Talomo River sa Tugbok, samtang anaa sa safe level ang ubang kasapaan sa Davao City.
Ang mga natalang pagbaha ug landslides sa pipila ka mga bahin sa rehiyon, gumikan kana sa LPA kon Low Pressure Area nga nipatibabaw duol sa rehiyon.
via || Bombo LJF
