DAVAO CITY – Mukabat sa kapin P22 million ang nahatag nga mga food and non-food items sa pito ka mga munisipalidad sa Davao de Oro.
Gikanayon ni DSWD XI Assistant Regional Director Dahlia Padillo, anaa sa P22,056,354 ang kantidad sa mga ayuda nga gihatag alang sa mga apektadong residente sa New Bataan, Nabunturan, Maco, Maragusan, ug Mawab. Dugang pa nga nasa 21,504 ang napangapud-apud nga mga food packs sa ahensya.
Samtang, 190 ka mga indibidwal sa probinsya ang nakadawat sa ilang pay-out nga mukabat sa P500,000 ang kantidad. Gikatakdang ipahigayon sa Davao de Oro ang programang Cash for Work sa DSWD XI alang sa mga apetadong residente sa nahitabong paglinog sa probinsya.
Taliwala sa igong suplay sa mga relief goods alang sa mga residente, mas haom nga mahatagan sila og trabaho alang sa ilang ubang panginahanglan.
Gikabutyag sab ang ilabihang kahadlok nga nasinati sa mga residente sa New Bataan nga nahimong episentro sa nahitabong linog.
Anaa karon sa 123 ka mga pamilya ang nasa evacuation centers samtang nagpatindog na lamang sa ilang tent ang ubang pamilya gawas sa ilang panimalay gumikan sa kahadlok tungod sa nagpadayong pagtay-og.
Sa pagkakaron, ginapaabot sa buhatan ang lain pang 100,000 ka mga food packs gikan sa mga kasikbit nga rehiyon isip augmentation alang sa igong supply sa relief goods alang sa mga biktima sa linog.
via || Bombo LJF
