DAVAO CITY – Personal nga nakighinabi si DSWD Secretary Rex Gatchalian sa mga nasunugan sa Barangay 21-C og 22-C, Piapi Boulevard, Davao City kagahapon, diin nanghatag sab ang buhatan og mga hinabang sa mga apektadong residente sa lugar.
Gikanayon ni Gatchalian nga mismong si Pangulong Ferdinand “Bongbong” Marcos Jr. ang nagmando kaniya nga muanhi sa lugar aron gilayong muhatag og hinabang gikan sa gobyerno.
Dugang pa, kanunayng andam ang DSWD na tabangan ang mga biktima ilabi nang matukod pagbalik ang ilang mga pinuy-anan.
Lauman sab sa mga fire victims ang dugang hinabang nga ihatag kanila sa panggamhanan. Anaa sab sa maong pagbisita sila Davao City Mayor Baste Duterte, SAP Secretary Anton Lagdameo, ug OPAMIN Secretary Leo Magno.
Nagpaabot og pasalamat ang mayor sa nasudnong panggamhanan sa hinanaling pagpanghatag og hinabang sa mga nasunugan sa dakbayan.
Kung kahinumduman, naugdaw ang nasa 1,200 ka mga kabalayan sa duha ka barangay sa Piapi Boulevard kaniadtong Sabado, Pebrero 25, bandang ala-una sa hapon diin miabot sa nuebe milyones pesos ang nahimong damyos sa nahitabong sunog.
