DAVAO CITY – Gikumpirma ni 10th Infantry Division spokesperson Captain Mark Anthony Tito nga ekslusibong nakahinabi sa Bombo Radyo Davao nga anaa na sa kamot sa militar ang usa sa mga suspek sa pagpamusil-patay sa negosyanteng si Yvonette Chua Plaza nga si Private First-Class Rolly Cabal.
Sumala pa ni Captain Tito, anaa lamang nagtago si Cabal sa area of responsibility niadtong tungura, ug karong back to military control na ang nahisgutang sundalo nga kasamtangang nakipagkoordina sa nagpadayong imbestigasyon sa SITG Plaza.
Samtang, at large gihapon ang laing pang suspek nga si Private First Class Romart Longakit ug padayon pang gipanubayan ang lokasyon niini.
Dugang pa sa opisyal, pagaatubangon gihapon sa duha ka sundalo ang mga kasong kriminal nga gipasaka batok kanila.
Sigon sa Philippine Army, nagpadayon ang pre-trial investigation sa duha ka mga prime suspects sa Plaza slay nga sila Brigader General Jess Durante III ug Colonel Michael Licyayo nga kasamtangang detinado sa headquarters sa Fort Bonifacio, Taguig.
Gipangkasuhan na sab ang duha ka opiyal og paglapas sa Articles 96 kon Conduct Unbecoming an Officer and a Gentleman; ug Articles 97 kon Conduct Prejudicial to Good Order and Military Discipline.
Posible sab nga ma-discharge sa serbisyo ang mga sundalo kon mapamatud-an ang kalambigitan nila sa pagpatay kang Plaza.
Bisan pa man nakasumite na ang ilang mga kampo og counter-affdavit ang mga suspek, anaa gihapon ang desisyon sa korte sa mamahimong kapaingnan sa ilang kaso.
Matud pa ni Tito, dili pa gihapon closed ang ginapanubayang kaso sa kamatayon ni Plaza, apan gisiguro sa 10ID ang ilang takus nga kooperasyon aron makab-ot sa nabiyaang pamilya ni Plaza ang hustisya.
Kahinumdumang nagpagawas ug resulta sa imbestigasyon ang SITG Plaza kaniadtong Enero 25 nga nagtudlo kang Durante ug sa lain pang walo niyang mga kaubanan nga nakakutlo sa kinabuhi ni Plaza kaniadtong Disyembre 28 sa iyang balay sa Tugbok, Davao City.
via || Bombo LJF
