DAVAO CITY – Kapin kon kulang nga P135,000 nga kantidad sa ilegal nga droga gikan sa upat ka mga dinakpan ang nakumpiska sa Task Force Davao Checkpoint sa may Barangay Lasang, Davao City, niadtong Enero 3 ning kasamtangang tuig.
Pinakadako niini ang ikaduhang pagkarekisa sa taknang alas-2 sa kaadlawon, ni Erwin Pelegrino Obeso, 39 anyos, mingyo ug residente sa Central Park, NHA Bangkal, ning dakbayan; diin nakumpiska gikan kaniya ang otso punto tres gramos nga gituohang shabu nga nagkantidad og kapin P128,000.
Una nang naaresto ang usa ka Arthur Pancho Jorojoro, 42, mingyo, ug nagpuyo sa Purok Pagkakaisa, Misa District, Magugpo West, Tagum City, Davao Del Norte, nga pasahero sa usa ka bus; diin nakuhaan kini og punto baynte gramos kon P3,200 nga kantidad sa gidudahang shabu.
Sa susamang adlaw sab naaresto ang usa ka Noel Tapuyan Suberan, 47 anyos, taga-Purok 3, Maniki, Kapalong, Davao del Norte, sakaty sa usa ka pampasaherong bus paingon sa dakbayan. Hupot niini ang punto nuebe gramos kon kapin P1,440 nga kantidad sa gituohang shabu.
Kinaulahian ang pagkasikop ni Vernidick Lalong-isip Rante, 45 anyos, taga-Purok 1, Riverview Barangay Ilang, Davao City pagka-alas 8 sa buntag; hupot niini ang punto nuebe gramos kon kapin P1,440 nga kantidad sa gituohang shabu.
Silang tanan, gipangtanggong na sa prisohan sa Bunawan Police Station nga pulos mag-atubang ug kasong paglapas sa RA 9165.
via || Bombo LJF
