DAVAO CITY – Selos ang motibo sa pagpatay sa usa ka babaye nga napalgang patay sa Barangay San Miguel, Santo Tomas, Davao del Norte kagahapon sa buntag.
Subay sa imbestigasyon sa Santo Tomas Municipal Police, napalgan sa mga cash for work volunteers sa barangay ang patayng lawas ni Rowena Ramirez alyas “En-en”, 40 anyos, residente sa susamang barangay.
Nakita sab ang ugang palwa sa saging nga gituohang gihikot sa liog sa biktima nga posibleng hinungdan sa iyang kamatayon.
Sa susamang adlaw gipahigayon ang operasyon aron dakpon ang suspek nga si alyas “JR”, 31 anyos, construction worker, ug residente sa Tibulao, Carmen, Davao del Norte.
Unang misibat ang suspek human sa krimen apan hingpit kining nadakpan bandang alas-2 sa hapon.
Gikustodiya na sa kapulisan ang suspek nga posibleng mag-atubang ug kaso.
Samtang, mibalibad ang amahan sa biktima nga ipa-autopsy sa patayng lawas sa iyang anak.
via || Bombo LJ Florendo
