DAVAO CITY – Nanawagan karon sa lokal nga kagamhanan sa syudad sa Davao ang head sa Integrated Gender and Development Division nga si Lorna Mandin nga pakusgan ang paghatag og trabaho, panginabuhian, ug pagpasiugda og skills training alang sa mga indibidwal nga walay trabaho.
Kana may kalabutan sa pagtaas sa ihap sa rape cases sa syudad.
Sa pakighinabi sa Bombo Radyo Davao sa opisyal, gibutyag niini nga sagad sa mga natalang suspetsado sa kasong rape, mga jobless o walay trabaho.
Nanghinaot ang opisyal nga kung adunay economic activities ang mga posibleng suspect, dili kini makahimo sa pag pagpahimulos sa kababaihan.
Hangyo sa opisyal sa mga rapists, nga inay nga mang rape, ipokus na lamang ang attention sa pagpangita og panginabuhian.
Nagpahinumdum sab si Mandin sa mga biktima nga isumbong sa awtoridad, pamilya, o sa mga ahensya ang sama niini nga panghitabo.
Kana tungod adunay nagkalain-laing ahensya sa dakbayan ang andam mutabang ug musiguro nga madakpan ug mapasakaan og kaso ang kinsa man nga mapamatud-an nga suspetsado.
Via || Bombo Bryan Chin Abe
