DAVAO CITY – Landig sa balay tambalanan ang mga biktima sa nahitabong panagbangga sa usa ka van ug private vehicle sa Balutakay, Hagonoy Davao del Sur kagabie.
Giila sa Hagonoy Municipal Police Station ang mga biktima nga mao si JAIME TEE JR, 40 anyos, residente sa Purok 2, Brgy. Bolton, Malalag, Davao del Sur kinsa nagmaneho sa Gray Hyundai Kona Sedan ug sakay ang tulo ka mga minor de edad nga nag edad 6, 7 ug 12 anyos.
Samtang sakay usab sa white Nissan Urvan Van si Dexter Cabasag, 39 anyos kinsa residente sa Agan Centro, Lagao, General Santos City.
Sa kakusog sa impact naguba ang simod nga bahin sa Hyundai Kona Sedan ug bungkag usab ang kilid nga bahin sa Nissan Urvan Van.
Sa karon nagpadayon pa ang imbestigasyon sa kapulisan hitungod sa maong insidente, hinuon walay namatay ug padayong nag pa alim karon sa Davao del Sur Provincial Hospital ang mga biktima.
Samtang ang mga sakyanan anaa sa disposisyon sa kapulisan.
Sa pikas bahin sa Marilog, angol usab ang driver ug asawa niini homan nga nabaliskad ug nahagbong sa pangpang ang gisakyang fortuner.
Natigayon ang insidente pasado alas 3:15 sa hapon sa Barangay Datu Salumay, Marilog District, Davao City.
Subay sa imbestigasyon sa Marilog PNP, nasayran nga padulong sa Bukidnon ang magtiayon nga sila Jerome Suito Jabiguero, 46 anyos ang pangidaron ug Myrna Jabiguero kinsa residente sa Purok 9, Barangay Nowbe, Malaybalay City, sakay ang mga nahisgutan sa fortuner.
Samtang gibabay niini ang kurbadahon nga bahin sa Davao Bukidnon National Highway, nakatulog matod pa ang driver nga si Jerome Suito Jabiguero hinungdan nga nisarasay ang sakyanan ayha kini nabaliskad ug nahagbong sa gihabugong 10-meters nga pangpang.
Nakahiagom og minor injuries ang magtiayon samtang guba usab ang nabaliskad nga sakyanan nga rehistrado sa pangalan ni Gerald Caroro, residente sa Purok 9, Barangay Nowbe, Malaybalay City Bukidnon.
Via || Bombo Mel Valledor
