DAVAO CITY – Padayon ang ginahimong pag-assess sa lokal nga panggamhanan sa Davao pinaagi sa City Disaster Risk Reduction and Management Office (CDRRMO) sa kadaut nga gibilin sa nahitabong sunog kagahapong adlawa sa St. John, Bucana ning dakbayan sa Davao.
Gikanayon ni Alfredo Baloran, hepe sa CDRRMO, base sa inisyal nga imbestigasyon sa Bureau of Fire and Protection, mukabat sa kapin kung kulang 40 ka mga panimalay ang nanga-ugdaw.
Dugang pa ni Baloran nga nagkalisud matud pa ang mga responders sa pagpalong sa kalayo gumikan sa kagamay sa dalan sa maong area.
Hinoon, walay gikatalang nakabsan sa kinabuhi o dili ba kaha naka-angkon og grabeng injury.
Sa pikas bahin, gilayon sab nga nanghatag ang City Social Welfare and Development Office og hinabang sa mga apektadong indibidwal.
Gikanayon ni Atty. Marlisa Gallo, hepe sa CSWDO, nga nakahimo na sila og pagpang-apud-apod og hot meals sa mga biktima sukad pa kagabii.
Lakip sab sa gitunol sa buhatan ang mga habol ug banig ngadto sa mga pamilya ug indibidwal nga temporaryong nagpabilin sa evacuation center sa Busna Gym ug Manggahan Gym sa Bucana.
