DAVAO CITY – Gibana-banaang anaa sa P400,000 nga kantidad sa gikatahapang marijuana ang nakumpiska atol sa gipahigayong marijuana eradication sa Kiblawan PNP sa Sitio Ulo Nikit, Barangay Kimlawis, Kiblawan, Davao del Sur.
Gipangunahan mismo ni PCpt Ian Marc Polestico, Officer In-Charge sa Kiblawan Municipal Police Station ang nahisgutang marijuana eradication nga gitawag nga “Oplan Hurot” kauban ang 1st ug 2nd Davao Sur Provincial Mobile Force Company ug pakig-alayon sa Philippine Drug Enforcement Agency XI.
Sumala kang PCpt. Polestico, mukabat sa 2,000 piraso sa gidudahang marijuana ang gipang-ibot ug gipangsunog sa nasangpit nga lugar nga adunay gilapdon nga kapin 500sq.meter sa luna ug adunay street market value nga P400,000.
Dugang pa ni PCpt Polestico, padayon nilang ginasuta kung kinsa ang nanag-iya sa maong luna aron manubag ug mapasakaan og tukmang kaso.
Ang kalampusan sa maong operasyon ang resulta sa maayong relasyon ug pagtinabangay sa PNP ug katawhan aron masumpo ang illegal nga droga sa nasud.
