DAVAO CITY – Sikop sa gipahigayong buy-bust operation ang usa ka lalaki sa Purok Baybay, Barangay Bobon, Mati City, Davao Oriental sa miaging adlaw.
Giila sa PDEA Davao Oriental ang maong dinakpan nga si Abdul Wahid Tagabunlang Tamay, alyas “Wawa”, 41 anyos, ug lumulupyo sa Barangay Central, Mati City.
Nasayran nga gawas-balik sa prisohan ang maong suspek diin tuig 2010 pa kini unang nadakpan ug nakapyansa kini alang sa iyang kagawasan.
Apan nasikop sab diay kini niadtong Enero ning tuig kasamtangan ug nakagawas sab kini pag-balik.
Sa ikatulong pagkasikop sa nahisgutan, nakuha gikan kang alyas Wawa ang usa ka pakete sa gituohang shabu nga nagkantidad og P1,000.
Nasakmit sab sa mga otoridad ang lain pang tulo ka pakete sa gituuhang shabu nga 3 gramos ang gibug-aton ug anaa sa P45,000 ang kantidad niini.
Pasakahan og kasong paglapas sa Republic act 9165 kon Comprehensive Dangerous Drugs Act of 2002 si alyas Wawa ug kasamtangang anaa na sa kustodiya sa otoridad.
Via || LJ FLORENDO
