DAVAO CITY – Gipangandaman karon sa Davao City Overland Transport Terminal (DCOTT) ug sa mga personahe sa Task Force Davao ang pagdagsa sa mga pasahero nga muadto sa terminal, taliwala sa una nga gipatuman nga one stop policy sa mga bus ug ang nagkaduol nga mga aktibidad sa Agosto dinhi sa syudad.
Sa eksklusibong pakighinabi sa Bombo Radyo Davao ngadto kang Aisa Usop, manager sa DCOTT, gikanayon niini nga ubay-ubay na ang pag-abot sa mga pasahero gikan sa nagkalain-laing lugar.
Saysay pa niini nga ang bulan sa Agosto maoy usa sa mga bulan nga adunay “influx of passengers” diin kamatikdan nga nadungagan na usab ang ihap sa mga bus streets.
Samtang subay sa bag-o lamang nga gipagulang income report sa maong ahensya, mitaas ngadto sa P3 million ang kita matag bulan gikan sa P1 million taliwala paman sa nagpadayon nga pandemya.
Nahisgutan sab ang gikaingong pag-usbaw sa pamasahe sa mga operators sa mga pampasaherong bus diin gikanayon sa buhatan nga dili pa magpa-usbaw kung wala pay kumpirmasyon o pagtugot gikan sa LTFRB.
Gikatakda nga magsugod ang Kadayawan Festival sa umaabot nga Agosto 5 pinaagi sa Kadayawan Tribal Village Opening sa Magsaysay Park ug Kadayawan 3D Mapping sa City Hall Facade pag-abot sa alas 6:00 sa gabie sa parehong petsa.
Sa Agosto 6, ipahigayon usab ang Hiyas sa Kadayawan Cultural Presentation o Talent Night sa Bunawan Ampitheatre sa Magsaysay Park, Misa Pasasalamat ug Pag-abli sa Kadayawan sa Agosto 15, Bantawan sa Agosto 6, Hiyas sa Kadayawan sa Agosto 17, Sayaw Kadayawan ug Bantawan sa Agosto 18, Dula Kadayawan sa Agosto 19, Indak Indak sa Kadayawan sa Agosot 20 ug sa Agosto 21, matapos ang maong festival pinaagi sa Pamulak sa Kadayawan, Pitik sa Kadayawan ug Tambayayong sa Kadayawan.
Via || DAVID FRANCISQUETE
