DAVAO CITY – Anaa sa kapin dos mil ka mga tulunghaan sa Davao Region ang andam na alang sa subling pag-abli sa klase karong tuiga.
Sumala ni DepEd 11 spokesperson Jenelieto Dodong Atillo nga moabot sa 2,200 ka mga public schools ingon man 498 ka mga private schools ang gikatakdang magsugod na sa face to face classes karong Nobyembre 2.
Sumala ni Atillo lauman ang pagsaka sa ihap sa mga magpa-enroll nga mga estudyante gikan sa elementary hangtud na high school.
Gipasalig usab sa nahisgutang opisyal nga andam na ang tanang mga tulunghaan sa gobyerno sa pagdawat sa mga tinun-an ug sa subling pagpahigayon sa face to face classes human ang kapin duha ka tuig nga blended learning gumikan sa COVID-19 pandemic.
Gipasalig usab ni Atillo nga bastante ang ihap sa mga magtutudlo diin anaa sumala pa sa 1 is to 45 ang ilang ratio o 45 ka mga estudyante ang ma-cater sa matag klase.
Sa karon nagpadayon na ang enrollment sa mga public schools ug sa Agosto 1 hangtud 26 gitakda ang Brigada Eskwela.
Subli sab nga gipahayag ni Atillo nga wala girequire sa DepEd ang “No vaccine. No enrollment”.
