DAVAO CITY – Inay nga vaccination card ang isumite sa mga partisipante sa Kadayawan Festival , girekomenda karon sa Kadayawan executive committe nga health declaration form na lamang ang isumite sa mga partispante nga musalmot sa mga aktibidad sa maong kasaulogan.
Sumala kang Councilor Al Ryan Alejandre, chairperson sa City Council Committee on Tourism, nagpaabot sila sa final approval ni Mayor Baste Duterte human gikasugyot niini nga health declaration form na lang ang isumite sa mga dancers ilabi na kadtong gikan sa nagkalain-laing mga LGU gumikan sa posibilidad nga adunay mga partisipante sa Kadayawan events ang wala nabakunahan tungod adunay pipila nga ilang naimbita nga wala nakaabot sa roll out sa bakuna tungod ang uban niini nanimuyo sa mga lagyong mga dapit.
Nasayran nga adunay pito ka mga lugar ang nagparehistro na alang sa open category sa Indak Indak sa Kadayawan diin lakip niini ang Sarangani, Cotabato, Mati, Davao Occidental, Agusan ug Zamboanga City.
Sumala sa konsehal, kung adunay makita nga sintomas sa COVID-19 ang usa, dili na lamang kini pakuyogon.
Samtang, subay sa nagpadayon nga gataas nga ihap sa kaso sa COVID 19, gikanayon sa konsehal nga dili nila mapasalig ugaling ma-kansela ang aktibidad gumikan mutuman gihapon ang ilang buhatan kung unsa man ang mamahimong mando sa IATF.
Samtang gi-awhag sa Kadayawan ExeCom ang publiko nga ipatuman ang disiplina sa kaugalingon aron dili na musaka ang kaso sa COVID-19 dinhi sa syudad.
Samtang, gikatakda nga magmuntar og “Bakuna para sa Katawhan Karong Kadayawan” ang Davao City LGU sa People’s Park sugod Hulyo 26-30 ning tuig kasamtangan.
Tumong niini nga mas mahimong available ang bakuna batok COVID-19 sa pangidaron nga 5 anyos pataas.
Via || Hana Rallos
