DAVAO CITY – Gisugyot sa Davao City Police Office ngadto sa tanang mga bar owners ang pagbaton og mas strikto nga seguridad human sa nahitabong shootout niadtong weekend.
Sa interview kang DCPO Spokesperson PMaj. Ma. Teresita Gaspan, malikayan unta kini kung wala nakasulod ang armas sa sulod sa establisyemento ug ang maong suspek nga anaa sa impluwensya sa makahubog nga ilimnon.
Gipaimbestigahan sab ang bar diin nahitabo ang insidente.
Makig-istorya sab ang DCPO sa mga bar-owners aron pahugtan ang seguridad pinaagi sa pagsunod sa liquor ban ug pagkuha og adunay katakos nga mga security personnel.
Gikumpirma sab ni Gaspan nga gipasakahan na og kasong murder ang suspek nga si Dr. Marvin Rey Andrew R. Pepino ug ang maong panghitabo usa lang ka isolated case nga dili angay’ng kabalak-an sa katawhan.
Sumala pa kang DCPO Director P/Col. Alberto Lupaz, ang suspek nga si Pepino ang professional ug buotan matud pa diin gibutyag niini nga adunay usa ka higayon nga nahimo siyang usa sa mga pasyente sa doktor kaniadto.
Gibutyag sab ni Lupaz nga walay bisan unsa mang derogatory record ang nahisgutan ug lagmit nakainom lang kini maong napusilan niya ang 19 anyos nga estudyante sa maong insidente.
Sa pikas bahin, gimando na ni Davao City Mayor Sebastian Duterte ang labing striktong implementasyon sa 2013 Ordinance No. 004-13 nga nagdili sa pagbaligya og mga ilimnong makahubog gikan ala-una sa kaadlawon hangtud alas-otso sa buntag.
Kini aron mapugngan ang pagdaghan sa krimen nga posibleng mahitabo sa pagkalango sa ilimnong makahubog.
Via || LJ Florendo
