DAVAO CITY – Usa ka 18 anyos nga babaye ang nakasibat sa kamot sa usa ka rapist human gilugos kini sa ilang balay sa Prk 5, Bankerohan Norte, Montevista, Davao de Oro, niadtong miaging adlaw.
Subay sa inisyal nga impormasyon, nasayran nga nag-inusara lang si alyas Mia samtang nangompra ug nangisda ang mga kauban niini sa balay.
Padulong na unta maligo si Mia sa dihang miabot ug mihangyo’ng moinom og tubig ang suspek.
Inay muinom og tubig ang suspek, diretsong misulod kini ug gihulga ang batan-on nga dunggabon kung mopalag.
Hinungdan nga malampusong nahimo sa suspek ang dautang binuhatan.
Nalipat gamay ang suspek hinungdan nga nakasibat si Mia pagawas sa ilang bintana aron mangitag tabang sa mga silingan.
Na-alarma ang suspek hinungdan nga dali-dali mi-ikyas sa may kakahoyan sa likod nga bahin sa maong balay.
Gihulagway sa biktima ang suspek nga itomon, igo lang ang kadak-on, 5ft ang katas-on, naka bonnet , naka jacket, naka pajama og itom ug naka back pack.
Sa kasamtangan, milusad na og imbestigasyon ang mga sakop sa Montevista Municipal Police Station.
Samtang, gipahimangnoan usab sa awtoridad ang katawhan nga mahimong magbinantayon karong panahona.
Via || LJ Florendo
