DAVAO CITY – Gipasidunggan sa Department of the Interior and Local Government (DILG) ang dakbayan sa Davao tungod sa taas nga iskor niini sa pagpatuman sa kalinaw, seguridad ug mga malampuson nga mga lakang alang sa malinawong komunidad.
Nakakuha kini og 95% compliance score alang sa tuig 2019 ug 87.98% alang sa tuig 2021.
Ang maong pasidungog ang kabahin sa DILG’s Peace and Order Performance Audit for all Local Government Units nga gipangunahan ni DILG Regional Director and Regional Peace and Order Council Head Secretariat Alex C. Roldan.
Gipasalamatan ni Public Safety and Security Command Center Head Angel Sumagaysay ang maong ahensya sa paghatag og dakong pagtagad sa ilang mga gipahigayong mga lakang aron mapanalipdan ang kaluwasan ug kalinaw, ilabi na ang ilang dakong pagsalig sa mga Dabawenyo.
Gikanayon pa ni Sumagaysay nga ipabilin nila ang maayong estado sa seguridad sa lungsod ug ang makanunayong komunikasyon sa mga sakop sa security and safety clusters; pagpahugot sa seguridad sa mga borders ug ang visibility sa mga convergence areas; ug ang pagpadayon sa culture of securtity diri sa dakbayan.
Kahinumduman, usa sa mga laraw nga gikanayon atol sa inaugural speech ni Mayor-elect Sebastian “Baste” Duterte mao ang pagpabilin sa mga programang panseguridad isip prayoridad sa iyang administrasyon.
Via || LJ Florendo
