DAVAO CITY – Nanawagan karon ang pipila ka mga mananagat sa dakbayan sa Dabaw ngadto sa hingtungdang mga ahensiya sa kagamhanan nga tabangan sila gumikan kay halos tulo ka bulan na sila nga walay tarong nga kapanginabuhian gumikan sa dagkong mga balud sa kadagatan hatud sa habagat.
Sumala pa sa PAGASA, wala pa sila’y kasiguruhan hangtud kanus-a molungtad ang dagkong mga balud sa kadagatan.
Tambag na lang niini ngadto sa mga mananagat nga motuman sa mga pahimangno sa otoridad aron malikay sa disgrasya sanglit subay sa ilang monitoring, posibling masinatian ang hangtud lima ka metros nga gitas-on sa mga balud hangtud sa mosunod nga bulan.
Subay sa pagbana-bana sa mga mananagat, halos P9,000 na ang ilang pagka-lugi gumikan sa habagat.
Sa pikas bahin, halos pito ka mga balay usab ang nanga-guba sa Barangay Daliao, Toril ning syudad.
Apil usab sa na-damyos sa dagkong mga balud ang bangkang panaganatan sa ubang mga mananagat sa maong dapit.
Samtang, nagpalabay usab sa kagabhion sa evacuation centers ang mga nagpuyo daplin sa dagat sa Punta Dumalag, Matina Aplaya ning syudad.
Gikanayon ni City Disaster Risk Reduction Management Office (CDRRMO) head Alfredo Baluran, dugay nang gipahimangnuan ang mga residente nga mobakwit apan padayon nga nag-magahi.
