Mga Higala Komusta Ug Maayong Buntag!!!
Karong adlawa Lunes Santo ang entrada sa semana Santa. Kini ang panahon sa matag-usa sa pag-obserba sa kasakit nga giantos sa atong labaw nga makagagahom samtang nag-antos kini sa kalbaryo hangtod na nga gilansang siya sa Krus. Ang pagsugod sa timailhan nga kita nag-obserba sa Semana Santa ang pag bendita sa mga lukay nga gitawag kini sa simbahan ug Palm Sunday. Ug kini gisaulog sa tibuok kalibutan sa tumutoong Katoliko sama sa pag-obserba sa Semana sa Santa ilabi na sa adlaw nga Hwebes ug Byernes Santo.Isip usa kini ka kalibutanon nga kalihukan sa tanang kristyano sa tibuok kalibutanon, ang lider sa simbahang Katoliko pinaagi ni Papap Francisco, siya naawhag natong tanan nga kung mahimo atong puy-anan ang pagpabilin nga mapaubsanon sa atong kaugalingon.
Kini ang kabahin sa iyahang mensahe atol sa Palm Sunday didto sa Vatican City sa dakong hawan sa St. Peter’s Square. Ang 82 –anyos nga lider sa simbahang katoliko ang naghatag sa iyahang homiliya alang sa binilyon nga mga katawhan sa tibuok kalibutan. Ug atol sa Balaang Misa, gitambungan sab kini sa libuan ka mga katoliko nga sagad mga turista nga gikan pa sa nagkadaiyang bahin sa kalibutan. Ning panahon sa pagpasakit ni Hesu kristo iyahang gihinumdom ang pagsulod niini sa Jerusalem nga gihulagway niya isip “humility in the face of triumphalism.” Nga kung atong hubaron sa atong kaugalingong pinilungan, ang pagkamapaubsanon diha sa dagway sa kadaugan. Kadaugan luyo sa mga kapildihan ug mga kalisod nga atong gisagubang sa matag adlaw natong pagkinabuhi ibabaw ning kalibutan. Gihimong paga-inganan sa Santo Papa ang hulagway sa matag gutlo sa atong gisagubang nga kalisod ilabi na sa panahon sa mga tentasyon kinahanglan nga atong atubangon pinaagi sa pagpresirba sa kalinaw sa atong tagsa-tagsa ka mga kasing-kasing. Tinuod nga kung kita dunay kalinaw sa matag-usa adunay kasiguruhan nga kita lisod maapektuhan sa mga tentasyon gikan sa dautan.
Atong balikan ang unang panawagan ni Pope Francis sa tibuok kalibutan ning panhon sa pag-obserba sa Semana Santa ang iyahang giluwatan nga Pulong ang pagkamapaubsanon. Kini nga giluwatang mensahe sa Santo Papa alang kanako usa ka dakong hinagiban aron atong makab-ot ang kalinaw sa tibuok kalibutan, sa matag nasud, tagsa-tagsa nato ka mga lugar ilabi na gyud sa tagsa-tagsa nato ka mga pinuy-anan. Kay pinaagi sa pagpaubos sa atong kaugalingon, malikayan man nato ang mga problema nga muresulta kini sa pagkaguba sa relasyon, diha sa atong mga kaubanan, mga silingan ug sa bisan man unsang grupo o mga tawo diha sa atong katilingban.
Ug haom kini sa atong panahon karon sa atong nasud nga taliabot na ang paghukom sa mga katawhan nga tanang mga kandidato mutamod sa gitawag nga pagpapaubos sa matag usa aron malikayan ang mga kakulian sa giisip nga paghatag sa sagradong buto sa mga tawo sa umaabot nga Mayo.
Mismong ang pinakataas nga lider sa simbahan ang nag-awhang kanatong tanan nga puy-an ang pagkama-mapaubsanon tungod sa iyahang kamatinud-anon iyaha man kining gipuy-an sa iyahang kaugalingon. Karong umaabot nga Hwebes Santo iyahang personal nga buhaton ang paghugas sa mga tiil sa 12 ka mga piniriso sa syudad sa Velletri Roma atol sa tradisyunal nga seremonya kabahin sa pag-obserba sa Semana Santa. Ug kini nga buhat dili na bag-o sa Santo Papa nga kaniadto pa iyaha naman kining gipuy-an . Ug karon, atong subling nakita sa Santo Papa nga mismo siya ang nagdasig sa tanang katawhan , kabus ka man o adunahan, nasintisyahan kaman o gawasnon sa imung kinabuhi karon, alagad ka man sa simbahan o sa usa ka nasud o komunidad, alang kaniya kitang tanan kinahanglan nga magkahiusa sa pagpaubos sa kaugalingon alang sa kalinaw sa kalibutan. Kay kung wala kini nga matang sa taras sa atong kaugalingon unsaon man nato sa pag-angkon ang kalinaw ilabi na gyud ang kabag-uhan dili lang sa matag usa nga katuyuan lakip na sa tanang katawhan
