DAVAO CITY – Gipasalig ni Police Chief Supt. Marcelo Morales, regional Director, nga magpahigayin sila ug lalom imbestigasyon ingon man evaluation kalabot sa insidente sa pagpatay sa peneriso nga si Rico Jay Lauron Labao, 27, residente sa Morio-Morio, Kilometer 8.5, Matina Pangi ning dakbayan human nga mosukol sumala pa kini sa kapulisan.
Kahinumduman nga si Labao mao ang suspek sa pagpatay sa sais anyos nga batang babaye sa milabay nga bulan.
Apan gitino sa opisyal nga kinahanglan himuon sa kapulisan ang mandato kung ugaling mosukol sa kapulisan ang binilanggo aron nga dili sab mabutang sa risgo ang ilang sitwasyon ingon man ang uban nga mga peneriso.
Sa ulahing imbestigasyon, samtang nagpahigayon ug inspeksiyon si PO1 Reggie Eleazo, duty jail guard, sulod sa male detention cell, kalit sumala pa nga giilog ni Labao ang armas niini hinungdan ug nakahimo pa pagpaboto ang suspek nga maoy hinungdan nga diriyot maigo si SPO3 Richard Dionisio, Chief Investigator, nga kalakip sa nagpahigayon ug inspeksiyon.
Dali nga giilog ang armas gikan sa suspek diin milanog pa ang sunod-sunod nga boto nga maoy hinungdan nga gipusil kini ni SPO3 Dionisio tumong sa lawas.
Dali pa nga gidala sa balay tambalanan si Labao apan gideklara kining dead on arrival sa mga doktor.
Nagpahigayon sumala pa ug inspeksiyon sa mga presohan ang kapulisan isip kabahin sa gipagulang memorandum sa City Director o ang gitawag nga City Wide Oplan Galugad.
