DAVAO CITY – Kinyentos ka pesos ang multa sa mga makasupak sa ordenansa nga naglimita sa sulod sa baynte segundos lamang nga pagpakanaug ug pagpasakay sa mga yellow box sa dakbayan.
Giklaro hinoon ni City Transport and Traffic Management Office (CTTMO) Chief Deonesio Abude nga exempted hinoon niini ang mga sakyanan nga nagapakanaug ug mga pasahero nga mga buntis ug mga dunay kabilinggan sa panglawas ingon man mga tigulang.
Una nang nasayran nga sugod karong Lunes, Hunyo 25, dili na tugtan nga molapas sa baynte segundos ang pagload ug unload sa mga pasahero sa yellow box dinhi sa dakbyan sa Davao.
Nasayran gikan kang City Transport and Traffic Management Office (CTTMO) inisyatibo nila ang baynte minutos nga parking period isip pagtuman sa Comprehensive Transport Traffic Code of Davao City.
Nasulat sa nahisgutan nga ordenansa nga angay nga limitado lamang ang oras sa pagload ug pag-unload sa mga pasahero.
Sumala pa kang Abude pinasikad sa ilang obserbasyon gihimo na nga terminal sa mga PUJ ug PUV ang mga yellow box aron nga mapuno kini ug mga pasahero.
Daku ang pagtuo sa CTTMO nga daku ug ikatabang ang baynte minutes nga parking period sa pagpaluag sa mga kadalanan sa dakbayan.
