DAVAO CITY – Sagad sa mga nangamatay sa sakit nga tipdas mao ang mga bata nga gitakboyan sa sakit ug napasagdan lamang hinongdan nga naigo sa komplikasyon.
Kini ang gitataw ni Dra. Jolinda Acosta, sa City Health Office (CHO), kinsa nagkanayon nga kung ang mga biktima kapasagdan daku gayud ang posibilidad nga matakboyan sa sakit ang mga kabataan ug sagad sa mga nabiktima mangamatay gumikan sa komplikasyon.
Sumala pa kang Dra. Acosta nga ang pulmonia usa lamang sa mga komplikasyon nga mamahimo nga makakalas sa kinabuhi sa mga biktima. Kini ang usa sa mga hinongdan nga mas gipaspasan karon sa mga ginsakpan sa CHO sa pagbakuna sa mga kabataan.
Kakulang sa tukma nga panagang pinaagi sa Anti-bodies ang hinongdan nga ang uban nga mga bata dali lamang nga matakda sa balati-an nga tipdas. Kini kung ang inahan wala sukad-masukad natakboyan ug tipdas ug wala sab nabakunahan.
Sumala pa kang Dra. Jolinda Acosta nga nasuta sa mga epidemiologist sa dihang gisuta ang Barangay 23-C diin ubay-ubay ang natakboyan sa sakit nga tipdas dunay mga balay nga sa usa ka kwarto halos baynte siete ka tawo ang nagpuyo. Kini ang hinongdan nga paspas ang pagtakod sa mga balatian.
