DAVAO CITY – Mas pahugtan karon sa kapulisan ang ilang pagmonitor sa palibut ilabi na sa nagsingabot nga anibersaryo sa rebeldeng New People’s Army (NPA) ugmang adlawa, Marso 29.
Partikular nga nangandam ang ang mga istasyon sa Davao del Sur Police Provincial Office (DSPPO) ug Davao Occidental Police Provincial Office (DOCPPO) kini aron dili subling mahitabo ang gihimo nga pagpangatake sa mga rebelde sa Bansalan PNP nga gikamatay sa upat ka mga non-combatant officer.
Kahinumduman nga una ng nagpahayag ang Communist Party of the Philippines nga modeklara sila og unilateral ceasefire ayha matapos ang bulan sa Marso apan dili pa gihapon mokumpiyansa niini ang kagamhanan sanglit nagapahigayon pa gihapon ug pagpangatake ang mga rebelde.
Gimandoan na sab ni Senior Superintendent Samuel Gadingan sa DSPPO, ang tanan nga mga hepe sa istasyon sa kapulisan sa lalawigan nga kinahanglan magpabinantayon kanunay ug pahugtan pa ang seguridad aron nga dili makapahimulos ang mga NPA.
Kalakip sab sa ilang gimonitor karon sa kasundalohan mao ang presensiya sa mga armadong grupo nga nahimutang sa bukiron nga bahin sa mga lungsod sa Bansalan, Matanao ug Magsaysay diin kaabag nila sa pagpatuman niini ang mga sakop sa kapulisan.
