DAVAO CITY – Nag-atubang na karon ang usa ka kinse anyos nga batang lalaki ug kasong attempted murder human nga misulay kini pagpatay sa usa ka pulis sa Times Beach 76-A ning dakbayan sa Davao.
Sa gipagula nga resolusyon, adunay nakitang lig-on nga basehan ni prosecutor Imee Bisera-Mabale aron nga pasakahan ug reklamo ang akusado pinasikad sa affidavit-complaint nga giduso ni Police Officer 1 Daniel A.P. Garcia sa Compostela Valley Provincial Public Safety Company.
Gikanayong anaa sa pinuy-anan sa iyang ugangan si Garcia sa Times Beach ug dihang migawas kini bandang 2:41 sa kadlawon aron nga mangihi, nakita sumala pa niini ang pito ka kalalakin-an diin upat niini ang nagdala ug kutsilyo samtang ang uban adunay dala usab nga botelya.
Dihang iyang gipangutana ang mga nahisgutan kung asa moadto, tulo sumala pa sa lalaki nga adunay dala nga botelya ang miduol kaniya ug misulay paghapak kaniya samtang ang uban misulay usab ug pag-atake.
Dali sumala pa nga mibunlot sa iyang armas si Garcia ug nagpahibalo nga usa siya na pulis. Wala sumala pa miundang ang mga suspek ug gilabay pa siya ug bato ug botelya samtang usa sab ang mitira kaniya ug Indian pana apan swerte kay wala na-igo si Garcia.
Gikanayong paspas sumala pa nga nanagan ang mga suspek human ang insidente. Samtang gibutyag sab ni Bisera-Mabale nga ang laing unom pa ka mga suspetsado nga misulay sab pagpatay sa biktima ang ipailalom sab sa regular preliminary investigation apan kinahanglan nga makuha ang address sa mga nahisgutan.
Samtang gikonsidera sa prosecutor nga legal ang pagsikop sa 15 anyos ilabi na nga nadakpan kini dihang iyang gihimo ang krimen.
