Nakadwat og pag-ila ang usa ka drayber sa Texas gumikan sa iyahang pangidaron nga kasamtangan gihapon nga nagtrabaho.
Giila nga labing tigulang nga drayber sa Bus sa tibuok kalibutan ang usa ka senior citizens nga lalaki, nga nag-edad og 95 anyos,nga gikan sa Texas, Estadus Unidos.
Naila ang maong lalaki nga si Raymond Hager, gikan sa Wichita Falls.
Daghan ang mibilib sa iyang pagmaneho ug nakakuha sa pag ila sa tibuok kalibutan ang iyang edad ug status isip usa ka aktibo nga drayber sa bus niadtong Mayo 2025.
Siya usa ka drayber sa Falls Ride, ang sistema sa pampublikong transportasyon sa siyudad, sulod sa 27 ka tuig.
Gibutyag ni Hager nga nagsugod siya sa pagmaneho sa dihang nag edad siya ug 14 anyos, ug gilayon nga nahilig na kini sa pagmaneho og dagkong mga sakyanan.
Nasayran nga nagplano na diay kini nga moretiro sa edad nga 95, apan nausab ang iyang hunahuna ug miingon nga magpadayon hihapon siya sa pag-drayb basta himsog ug makahimo pa siya.
Agig pag-ila sa iyang talagsaon nga dedikasyon, gideklarar siya nga hatagan ug pasidungug sa ilang lokal nga kagamhanan sa dapit sa Wichita Falls niadtong Nobyembre 18,2025 isip “Raymond Hager Day.”
Samtang mapasalamaton usab ang edaran nga drayber ug miingon nga usa ka panalangin alang kaniya isip usa ka yano nga “tawo sa probinsya” nga nakadawat sa maong pasidungog.
