DAVAO CITY- Balhog sa kwerpo sa kapulisan ang USA ka 95-anyos nga Lolo human nga nagpadala kini sa iyahang gibating selos hinungdan nga gipusil niini ang iyahang silingan pasado alas sais kagabie sa Purok 26- B, Sitio Mayrin, Brgy. Maa, ning dakbayan sa Davao.
Giila sa Maa PNP ang biktima nga si Totoy Coles, 53 anyos, usa ka driver, samtang si Lolo giila nga si Gaudioso Montealto alyas Joseng, 95-anyos, walay trabaho nga susamang residente sa nasampit nga lugar.
Subay sa report sa kapulisan pinaagi sa mga indibidwal nga nakasaksi sa maong panghitabo nga sumala pa, ayha pa nahitabo ang krimen ang biktima nag-inusara nga naglingkod sa iyahang motorsiklo sa eskinita nga atubangan sa balay sa suspek ug kalit lang sumala pa kining miduol gikan sa likod nga bahin ug gipusil ang biktima sa iyahang likod.
Human sa maong panghitabo, dali nga gitabang ang biktima nga nakahiagom sa samad sa pagpusil sa drayber ug gidala sa Davao Doctors Hospital.
Samtang sa pagresponde sa kapulisan sa crime scene narekober ang .38 nga rebolber nga adunay tulo ka mga bala samtang ang suspek ang gidala sa Maa PNP.
Sa karon ang biktima ang padayon nga nagpaalim sa samad pinusilan sa iyahang likod nga bahin.
Sa pakighinabi sa bombo Radyo Davao ngadto sa asawa sa biktima nga si Almera Coles , selos matud pa ang hinungdan sa maong pagpamusil sa iyahang bana.
Dugang pa sa asawa, dugay na sab nga adunay problema ang maong edaran sa hisgutanan kalabot sa daw naibgan niini nga usa ka menor edad sa ilahang lugar.
Sumala pa ni Almera nga niadtong tungura igo ra gayud usab nga nipalit ug luy-a ang usa sumala pa ka dalagita nga nakapatandog sa natulog nga pagbati sa 95-anyos nga suspetsado ngadto sa ilahang tindahan.
Nagkahinabi sumala ang iyahang bana ug ang wala panganli nga dalagita ug nakomedyahay pa tungod sa kamahal sa presyo sa luy-a karong panahuna.
Apan gilahi na diay kini ug sabot ni Lolo nga nagtan-aw ra usab niadtong tungura nga daw nagpangagot na ang ngipon ug sa wala damha iyaha gyud nga nahimo ang krimen nga human nga nakauli na ang dalagita sa ilahang panimalay.
Sa karon patong-patong nga kaso ang atubangon sa 95-anyos sama sa pagsupak sa RA 10591 kon paghupot ug armas nga walay dokumento ug kasong Frustrated murder nga karon nagtingkagol kini sa selda sa Maa PNP.
