DAVAO CITY – Mukabat sa 28 ka pamilya ang gipahikling kagabie gumikan sa nahitabong pagbaha. Kahinumdumang nagpakanaug og advisory ang DOST-PAGASA og Heavy Rainfall Warning No.1 diri sa rehiyon sa Davao.
Gumikan kini sa Low Pressure Area kon LPA nga namonitor sulod sa Philippine Area of Responsibility kon PAR.
Nasayran nga kagahapong adlawa nahimutang ang daut nga kahimtang sa panahon sa gilay-ong 530km sidlakan sa Davao City.
Gumikan sa kusog nga pagbundak sa ulan, halos tulo ka oras nga natanggong ang mga pasahero diin ubay ubay usab ka mga sakyanan ang nadaut gumikan sa pagbaha sa mga kadalanan nga gilangkuban sa Downtown area, Matina, Bangkal, ug bypass Puan.
Nakasinati usab og pagbaha ang Golden Shower Street, Brgy. Mintal, Tugbok District, Davao City; Purok 35 Maharlika, Maa Davao City; Purok 6 Mangalcal Carmen Davao del Norte ingon man ang Panabo City Davao Del Norte.
Sa Matina Gravahan, mukabat sa 28 ka pamilya o 94 ka mga indibidwal ang gipahikling diin lakip sa gibakwit ang haya sa usa ka patay sa maong lugar. Hinuon paspas usab nga nag subside ang tubig busa nakauli gilayon ang mga gipabakwit.
Via || Mel Valledor
