DAVAO CITY – Gisugdan na sa Davao City Police Office (DCPO) ang pagbansay sa 900 Auxiliary Police officers nga magsilbing kaabag sa kapulisan sa pagpatuman sa kalinaw sa dakbayan.
Matud pa kang DCPO Police Senior Inspector Maria Teresita Plaza-Gaspan, kinatibuk-ang 910 auxiliary police ang mopailalom sa unang pagbansay sa Mayo 2 alang sa mga makapasar sa neuropsychiatric examinations nga gikatakda sa mosunod nga semana.
Kahinumduman nga kaniadtong milabay nga Abril 13, kapin sa 1,000 ka mga aplikante ang misumite sa ilang aplikasyon sa nagkadaiyang police stations sa dakbayan.
Gitataw sa opisyal nga kadtong mga qualified applicants ang e-endorso alang sa final screening.
Gipahigayon ang recruitment human nga gilagdaan ni Davao City Mayor Sara Duterte-Carpio ang sugyot ni acting DCPO director Senior Superintendent Alexander Tagum nga adunay kalabutan sa Integrated Revitalized Operation of Neighborhood-Watch (Iron).
