Gideklara na sa 10th Infantry Division (Philippine Army) nga insurgency-free na ang tanang 84 ka siyudad ug munisipalidad sulod sa ilang area of responsibility.
Sumala kang Major Ruben Gadut, public affairs chief sa 10ID, sakop sa deklarasyon ang tibuok Davao Region ug pipila ka estratehikong lugar sa kasikbit nga probinsya.
Gipamahayag sa militar nga posibleng ang 10ID ang unang infantry division sa nasod nga nakab-ot ang hingpit nga insurgency-free nga status sa tibuok nilang ginsakpang lugar.
Lakip niini ang mga bahin sa Sarangani, North Cotabato, Sultan Kudarat, South Cotabato, Bukidnon, Agusan del Sur, ug Surigao del Sur.
Matod ni Gadut, wala na’y nahibiling aktibong pwersa sa New People’s Army sa ilawom sa hurisdiksyon sa 10ID.
Gibuityag usab niya nga nabungkag na ang manpower ug wala na’y firepower ang grupo, busa dili na kini makahimo og guerrilla fronts o tactical offensives sama sa ambush batok sa mga sundalo.
Ang deklarasyon resulta sa validation nga gihimo sa local peace and order councils base sa sukdanan sa Armed Forces of the Philippines ug Philippine National Police nga nagtimbang sa kapasidad sa insurgents sa manpower, armas ug impluwensya sa komunidad.
Gipasabot usab sa militar nga dako ang natabang sa Community Support Program nga nagdala og serbisyo sa gobyerno ngadto sa mga barangay nga kaniadto naapektuhan sa insurgency.
Samtang na-neutralize na ang internal security threat, ang commander sa 10ID nga si Alvin Luzon nagtinguha nga ipasa na ang pangunang responsibilidad sa seguridad ngadto sa PNP ug mga lokal nga gobyerno.
Tungod niini, mas makapokus na ang militar sa external defense, lakip ang pagpanalipod sa territorial integrity ug mga baybayon nga duol sa West Philippine Sea.
Matod sa 10ID, ang kalampusan resulta sa “whole-of-nation approach” diin nagtinabangay ang militar, lokal nga liderato ug komunidad aron mapapas ang impluwensya sa insurgency sa rehiyon.
