DAVAO DE ORO- Moabot sa otsenta ka mga pamilya gikan sa landslide nga nahitabuan sa Brgy Masara Maco davao de Oro niini lamang tuiga ang gikatakdang makadawat ug mga housing units sa mosunod nga bulan.
Gikanayon ni Davao de Oro Governor Jayvee Tyron Uy, 80 ka mga housing units ang gikatakdang itukod sa 1.6 ka iktarya nga luna nga nabutang sa Brangay Panibasan, Maco Davao de Oro.
Ang nahisgutang mga pamilya ang mga nahimong biktima sa nahitabong landslide sa Zone 1 barangay Masara Davao de oro niadtong Pebrero 6, 2024 nga mikalas ug dul-an 98 ka mga kinabuhi, ug halos walo usab ang nagpabiling missing.
Sumala ni Uy ang nahisgutang 80 ka mga pamilya ang magsilbing unang hugna pa lamang gikan sa 127 ka mga pamilya nga naggikan sa ground zero.
Ang ika-duhang hugna nga gilangkuban sa nahabiling 47 ka mga pamilya ang gikatakdang ipang-balhin usab sa laing relocation site sa mosunod nga mga bulan.
Ang nahisgutang proyekto nga gitawag ug “Balayanihan ang hiniusang paningkamot sa mga lokal nga opisyal sa comval, kagamhanang national ug mga pribadong sektor.
Dugang pa ni Uy nga mokabat sa napulo ka milyon ka pesos ang pasi-unang pondo alang sa nahisgutang housing project lakip na niini ang pagpalit sa maong luna.
Sa pikas bahin, gikanayon ni Merlita Serra, 66 anyos ug usa sa mga biktima sa landslide ug maka-benepisyo sa maong proyekto nga naghinam-hinam na sila nga magbaton ug permamenting pinoy-anan sanglit tumang kalisod ang ilang pagpuyo sa mga tent sulod sa dul-an 4 ka bulan sukad mahitabo ang trahedya.
Dugang pa ni Serra nga gani hangtud karon padayon magbalik-baik sa iyang hunahuna ang tiingog sa ilang mga silingan nga misinggit ug nagapangayo ug tabang. Sa maong panghitabo, namatay sumala pa ang apo ni Serra human natabunang buhi sa mga midahiling yuta.
