Miabot na sa walo ang gidaghanon sa mga nakabsan sa kinabuhi atol sa pagdahili sa bungtod sa basura sa Binaliw landfill sa dakbayan sa Cebu, human marekober ang duha ka patay nga lawas taliwala sa nagpadayong search and rescue operations.
Padayon usab ang pagpangita sa laing 28 ka mga indibidwal, samtang mitabang sa operasyon ang 38 ka mga ginsakpan sa Philippine Army gikan sa 525th Engineering Battalion ug sa CBRN Troops.
Sumala kang Councilor Dave Tumulak, adunay mga structural beam nga nakababag sa lugar, mao nga naggamit ang mga rescuer og angay nga mga ekipo aron matangtang ang maong mga sagabal.
Gipatin-aw usab niya nga nagpabilin pa sa search and rescue mission ang operasyon ug wala pa kini giisip nga recovery operation.
Sa laing bahin, gibutyag ni Mayor Nestor Archival Sr. nga ang DENR ang angay manubag sa mga paglapas sa mga regulasyon may kalabotan sa landfill.
Gibug-aton niya nga dili dayon-dayon mapapasarado sa lokal nga kagamhanan ang pasilidad gumikan adunay environmental clearance nga giisyu sa DENR.
Ang landfill nga gipaandar sa Prime Integrated Waste Solutions Inc. (PIWS) nahugno niadtong Enero 8, nga miresulta sa pagkaalaot sa pipila ka mga trabahante bisan pa sa mga reklamo ug mga pahimangno gikan sa mga lokal nga opisyal.
Dugang pa sa alkalde, responsibilidad sa DENR nga manguna sa pag-imbestiga ug sa pagbuot sa padayon o pagpahunong sa operasyon sa maong pasilidad.
