Gipahibalo sa mga otoridad nga walo ka tawo ang na-trap human sa kalit nga pagbaha sa Mini Asik-Asik Falls nga nahimutang sa Barangay Carmen, Baguio District, Davao City, niadtong Setyembre 14, 2025. Matud sa Davao City Responders, usa na ang nakumpirmang patay gikan sa maong insidente.
Base sa inisyal nga impormasyon, adunay outreach program nga gipahigayon sa lugar ang usa ka mountaineering club sa dihang miigo ang kusog nga tubig gikan sa bukid. Ginasuta pa sa mga otoridad kung ang mga biktima mao gayud ang mga miyembro sa maong grupo.
Gitun-an usab karon sa mga imbestigador ang posibilidad nga ang kusog nga agas sa tubig gikan sa kabukiran maoy hinungdan sa kalit nga baha, bisan pa nga walay ulan nga naitala sa ubos nga bahin sa syudad. Padayon ang operasyon sa mga otoridad aron masiguro ang seguridad ug matabangan ang uban pang mga posible nga naipit sa insidente.
